Fri, 28 Feb 2020

Hiligaynon News: Magalapas sa APC pagamultahan sang DTI

Philippine Information Agency
20 Jan 2020, 18:38 GMT+10

SYUDAD SANG ROXAS, Capiz, Enero 20 (PIA) - Ginahingyo ni Ken Queenie Cunada nga hepe sang Department of Trade and Industry (DTI) - Capiz sa mga bumalakal nga magbulig sa pagbantay sa presyo sang mga nagapanguna nga kinahanglanon agud mapaabot sa ahensiya ang mga magalapas sa Automatic Price Control (APC) nga naga-epekto sa probinsya matapos nga gindeklara ang Capiz sa idalum sang State of Calamity sadtong Disyembre 26 bangud sa paglaslas sang bagyo Ursula.

Subong man ginapahanumdom man ni Cunada ang natungdan nga mga establisemento komersyal nga magsunod sa APC agud nga malikawan ang multa ukon penalidad.

Ang publiko ang sarang makapangayo sang bulig ukon makapalab-ot sang ila mga reklamo sa nagalapas nga mga establisimiento sa pinakamalapit nga Negosyo Center sa lugar ukon mag-direkta sa DTI Provincial Office sa Pueblo de Panay diri sa syudad sang Roxas.

Nahibaluan nga ang DTI ang gilayon nga nag-monitor sa presyo kag suplay sang mga nagapanguna nga kinahanglanon ilabi na ang sa "manufactured goods" matapos ang bagyo sadtong Disyembre 25.

Samtang ang listahan sang mga nagapanguna nga kinahanglanon nga ginasaad sa APC ang ginpagwa sang DTI sadto pa sang Enero 4 kag nabalhag sa lokal nga pamantalaan.

Matandaan nga ginmandu man ni gobernador Esteban Evan B. Contreras ang prize freeze sa basic necessities kag prime commodities sang Enero 2 agud nga mapasiguro nga maprotektahan ang mga bumalakal kag mapabilin ang supply sang mga produkto sa merkado.

Ang epekto sang APC ang magalawig sang 60 ka adlaw umpisa sa pagdeklara sang State of Calamity. (JSC/AAL/PIA Capiz)

More Middle East News

Access More

Sign up for Middle East News

a daily newsletter full of things to discuss over drinks.and the great thing is that it's on the house!